අකුණු සහ සුළං එක්ක එන හදිසි කාලගුණ වෙනස.. අද හවස පරිස්සම් විය යුතු දිස්ත්‍රික්ක මෙන්න

දවස පටන් ගත්තේ සාමාන්‍ය විදිහට වුණාට අද හවස් වරුව නම් එතරම් සුබදායක වෙන එකක් නෑ වගේ. ඔබත් අද හවස ගමන් බිමන් යන්න, එහෙමත් නැත්නම් එළිමහනේ වැඩකටයුතු සැලසුම් කරගෙන ඉන්න කෙනෙක් නම්, මේ පණිවිඩය අනිවාර්යයෙන්ම ඔබ දැනගත යුතුමයි.
කාලගුණ විද්‍යා දෙපාර්තමේන්තුව විසින් නිකුත් කරන ලද නවතම නිවේදනයකට අනුව, අද (පස්වරු 2.00 න් පසුව) දිවයිනේ ප්‍රදේශ කිහිපයකටම තද වැසි සහ අකුණු සහිත නොසිතූ කාලගුණික වෙනසක් ඇතිවිය හැකි බව වාර්තා වෙනවා.
විශේෂයෙන්ම ඌව, මධ්‍යම සහ නැගෙනහිර පළාත්වලටත්, ඒ වගේම පොළොන්නරුව සහ මුලතිව් දිස්ත්‍රික්කවලටත් අද පස්වරු 2.00 න් පසු තැනින් තැන ගිගුරුම් සහිත ප්‍රබල වැසි ඇතිවීමේ වැඩි සම්භාවිතාවක් පවතිනවා. මෙහිදී ඌව සහ නැගෙනහිර පළාත්වල ඇතැම් ස්ථානවලට මිලිමීටර් 50 ඉක්මවූ සැලකිය යුතු තද වැසි පතිත විය හැකි බවයි කාලගුණ අංශ අනතුරු අඟවන්නේ.

බස්නාහිර, සබරගමුව සහ වයඹ පළාත්වලට මෙන්ම ගාල්ල සහ මාතර දිස්ත්‍රික්කවලටත් විටින් විට වැසි ස්වල්පයක් ඇතිවිය හැකි බව සඳහන්.
අකුණු සහ සුළං අනතුර ගැන සැලකිලිමත් වන්න!
වැස්සට අමතරව ගිගුරුම් සහිත වැසි සමඟ තාවකාලිකව හමන තද සුළං සහ දරුණු අකුණු අනතුරු ඇතිවීමේ අවදානමක් පවතිනවා. ඒ නිසා එළිමහනේ රැඳී සිටින අය, ගස් යට සිටීමෙන් සහ අනාරක්ෂිත විදුලි උපකරණ භාවිතයෙන් වළකින ලෙසත්, අනතුරු අවම කරගැනීමට පියවර ගන්නා ලෙසත් වගකිවයුතු අංශ ජනතාවගෙන් දැඩිව ඉල්ලා සිටිනවා.
කුඩයක් හෝ වැහි කබායක් ළඟ තබාගෙන, ආරක්ෂිතව ගමන බිමන සැලසුම් කරගන්න අමතක කරන්න එපා!