විගණකාධිපති ධුරය සඳහා ජනාධිපති අනුර කුමාර දිසානායකගේ නාමයෝජනාව ආණ්ඩුක්‍රම ව්‍යවස්ථා සභාව ප්‍රතික්ෂේප කර ඇති බව විශ්වාසදායක ආරංචි මාර්ග උපුටා දක්වමින් Daily Mirror වාර්තා කරයි.
මූලාශ්‍රවලට අනුව, මෙම කාරණය සම්බන්ධයෙන් බෙදීම් ඇති වූ බැවින් ව්‍යවස්ථා සභා සාමාජිකයන්ට ඡන්දයක් ගැනීමට සිදුව තිබේ. ඒ අනුව,
නාමයෝජනා ලැබූ පුද්ගලයාට විරුද්ධව සාමාජිකයන් පස්දෙනෙකු ඡන්දය ලබාදී ඇති අතර, පක්ෂව තිදෙනෙකු ඡන්දය දී ඇත.
විපක්ෂ නායක සජිත් ප්‍රේමදාස, ඔහුගේ නාමයෝජනා ලැබූ මන්ත්‍රී අජිත් පී. පෙරේරා සහ සිවිල් සමාජය නියෝජනය කරන සාමාජිකයන් තිදෙනාගෙන් එක් අයකු විරුද්ධව ඡන්දය දුන් අය අතර වාර්තාවේ සඳහන් වේ.
අගමැතිනි හරිනි අමරසූරිය, සභානායක බිමල් රත්නායක සහ ජාතික ජන බලවේගයේ මන්ත්‍රී අබුබකර් ආදම්බාවා යන අය පක්ෂව ඡන්දය දුන් අය අතර වන බව පැවැසේ.
ජනාධිපතිවරයාගේ නාමයෝජනා ලැබූ පුද්ගලයා විගණකාධිපති දෙපාර්තමේන්තුවේ නිලධාරියකු නොව පිටස්තරයෙකු බව වාර්තා වීමෙන් පසුව මෙම ප්‍රතික්ෂේප කිරීම සිදුව ඇතැයි Daily Mirror වාර්තා කරයි.
විගණකාධිපති දෙපාර්තමේන්තුව තුළ සිටින පුද්ගලයකු නම්කිරීම සම්ප්‍රදාය බව විපක්ෂ මන්ත්‍රීවරු වන දයාසිරි ජයසේකර සහ හර්ෂ ද සිල්වා පාර්ලිමේන්තුවේදී විවෘතව චෝදනා කළහ.
දෙපාර්තමේන්තුවෙන් පිටත පුද්ගලයෙකු පත්නොකරන ලෙස විගණක සංගම් ද ජනාධිපති අනුර කුමාර දිසානායකගෙන් ඉල්ලා සිටියේය.
ශ්‍රී ලංකා විගණන සේවා සංගමය, රාජ්‍ය සහකාර විගණක සංගමය සහ රාජ්‍ය විගණක සංගමය මේ සඳහා ලිඛිත ඉල්ලීමක් කර ඇත.
කෙසේවෙතත්, ඔවුන් ප්‍රකාශ කළේ විගණකාධිපති දෙපාර්තමේන්තුවෙන් සුදුසු පුද්ගලයෙකු නොමැති නම් පමණක් පිටස්තරයෙකු පත්කළ හැකි බවයි.
Post a Comment