ලෝකයම වසඟයට ගත් සරාගී ගිනි සිළුවක්,එක්සත් ජනපදයේ කැලිෆෝනියා ප්‍රාන්තයේ ලොස් ඇන්ජලීස්වල තමයි ඇය උපදින්නේ.ඒ 1926 ජුනි 01දා. ඇගේ සැබෑ නම වෙන්නේ නෝර්මා ජීන් මෝටෙන්සන්න මුදු ඇය බෞතිස්ම කරන්නේ නෝර්මා ජීන් බේකර් කියන නාමයෙන්. අභාග්‍ය නම් ඇගේ පියාගේ නම පිළිබඳ කිසිදු සඳහනක් නොමැති වීමයි,
ඇගේ මව වූයේ ග්ලැඩීස් පර්ල් බේකර්. ඇගේ පියා නොමැතිකමින් කුඩා කාලයේ පටන් මැරලින්ට ගත කරන්න වුණේ ඉතා කටුක ජීවිතයක්. ග්ලැඩිස් තම සැමියා නැතිකමින් මානසික ආබාධයකට ගොදුරු වුණා. මේ හේතුවෙන් ග්ලැරිස් පර්ල් බොහෝවිට මානසික ප්‍රතිකාර ලබමින් මානසික රෝහල්වල ගත කළා. මේ හේතුව නිසාවෙන් කුඩා ජීන්ට බොහෝවිට ළමා නිවාසවල ගත කරන්න වුණා. ඒ ළමා නිවාසයේදී කුඩා ජීන් ලිංගික අතවරයකට ලක් වූ බවත් වාර්තා වෙනවා.ඇයගේ ඉපැරණි මතකයන් අවුස්සන මැරලින් වරෙක කියන්නේ ඇය වයස එකොළහේදී පමණ පළමු ලිංගික අතවරයට ලක්වුණු බවයි.
කොහොම හරි ඇයව හදා වඩාගන්න භාරගන්නේ ගේ‍ර්ස් සහ ගොඩාඩ් කියන යුවළ.
ජීන් අවුරුදු 15දී තමන්ගේ අධ්‍යාපනය ඉවර කරනවා. ඒ නිසා ඇයට උසස් අධ්‍යාපනයක් ලබාගන්න වෙන්නේ නැහැ. ඒ අනුව 1943 දී ජීන්ව නැවතත් ළමා නිවාසයකට භාර දෙන්නේ ඇයගේ භාරකාර යුවළ වෙනත් ප්‍රදේශයකට මාරුවීම හේතුවෙන්. කොහොම හරි ඔය වගේ කටුක දිවියක් තමයි ඇය ගත කරන්නේ
ජීන් 1942 ජුනි 19දා ඇගේ පෙම්වතා වූ නාවික සෙබළ ජේම්ස් ඩගර්ටි සමඟ විවාහ වෙනවා.
ඔහු තම රාජකාරි සඳහා පිටත්ව ගිය පසුව මැරලින් රැකියාවක් සොයා වැනියුස් නගරයට යනවා.
වැනියුස් ආගමනයත් සමඟ ඇයට ඡායාරූප ශිල්පියෙක් මුණගැසෙනවා. මේ හමුවත් සමඟ ඇය නිරූපණ ශිල්පිනියක් ලෙස ඇයගේ වෘත්තීය දිවිය අරඹනවා.
මේ හේතුව නිසාවෙන් ඇයගේ පළමු විවාහයට කණකොකා හඬනවා. පසුකාලීනව Century Fox සමාගම සමඟ ගිවිසුමකට එළැඹෙන ඇය මැරලින් මොන්රෝ ලෙස තමන්ගේ නාමය පවා වෙනස් කරගන්නවා. පසුව ඇයගේ කොණ්ඩයේ වර්ණය පවා මේ නව වෙනස වෙනුවෙන් වෙනස් කළ බවද සඳහන් වෙනවා.
සුප්‍රකට පිටපත් රචක ආතර් මිලර් සමඟ ඈ යුග දිවියට එළැඹෙන්නේ 1956 දී. මැරලින් රංගනයෙන් දායකත්වය දැක්වූ අවසාන සිනමාපටය වූයේ ආතර් මිලර් රචනා කළ The Misfitsය.
එය ආතර් මිලර් මැරලින් සඳහාම රචනා කළ එකකි. මේ සිනමාපටය අතරමැදදී මැරලින්ව ආතර් හැරදා යනවා. ඒ ආකාරයට ඇගේ තුන්වන විවාහය අවසන් වන්නේ 1961 දීය.
මේ සැකෙවින් දැක්වූයේ මැරලින් මොන්රෝගේ දිවිය පිළිබඳ සරල විස්තරයකි. දැන් අපි බලමු මොකක්ද මේ මැරලින්ගේ නොදුටු පැත්ත කියලා.
මැරලින් සුන්දරත්වය සඳහා ප්ලාස්ටික් සැත්කමක් සිදුකළාද?
මැරලින් මොන්රෝගේ බොහෝ රසික රසිකාවියන් එය විශ්වාස කිරීමට කැමැති නැති වුණත් ඇයගේ සුන්දරත්වය පරිපූර්ණත්වයට පත් කර ගැනීමට සඳහා ශල්‍යකර්මයක් සිදු කළ බව රහසක් නොවෙයි.
මැරලින්ගේ හිස් කබලේ එක්ස් කිරණ සහ ඇගේ නිකට සහ නාසයේ සැත්කම් ගැන සඳහන් කරන වෛද්‍ය වාර්තා 2013 නොවැම්බර් 10 වැනි දින බෙවර්ලි හිලිස් හිදී වෙන්දේසි කිරීම සිදු කළේය.
මයිකල් ගුර්ඩින්ගේ සටහන් ඇතුළු පත්‍රිකා UCLA ප්ලාස්ටික් ශල්‍ය වෛද්‍යවරයකුගේ වාර්තා මෙලෙස බෙවර්ලි හිල්ස්හි වෙන්දේසි ආයතනයක් වන ජුලියන්ස් වෙතින් ඩොලර් 15,000 සිට ඩොලර් 30,000 දක්වා මුදලකින් වෙන්දේසියකට යැවුණි.
මොන්රෝ වසර 50 ගණනකට පෙර මියගිය බවත් පුද්ගලයෙක්ගේ වෛද්‍ය පෞද්ගලිකත්වය සඳහා ඇති අයිතිය මරණයෙන් වසර 50කට පසුව අවසන් වන බවත් ඇමෙරිකානු නීතියයි.
දශක දෙකකට ආසන්න කාලයක්, ඇගේ එක්ස් කිරණ පිටපත් මයිකල් සතු විය. ඔහු විශ්‍රාම යෑමට පෙර ඔහුගේ වෛද්‍ය සහකරුවාට ඒවා උරුම විය.
ලොස්ඇන්ජලීස් ප්ලාස්ටික් ශල්‍ය වෛද්‍ය නෝමන් ලීෆ්ගේ කාර්යාලයේ එලෙස වසර ගණනාවක් මේවා තිබෙන්නට ඇත.
බෙවර්ලි හිල්ස් වෙතින් ඇය ප්ලාස්ටික් සැත්කමක් සිදුකිරීම පිළිබඳ ලීෆ් ලියනවා.
ඔහු “මර්ලින් මයිකල්ගේ රෝගියකු වූ බවත් ඇය මියයෑමට ටික කලකට පෙර ඔහු ඇයව දුටු බවත් ගුර්ඩින් වසර ගණනාවක් තිස්සේ අහම්බෙන් මට සඳහන් කළා” කියා ද ලීෆ් ලියනවා.
මොන්රෝගේ ශල්‍යකර්මයේ කතාව 1949 හෝ 1950දී ආරම්භ වන අතර එය හොලිවුඩ් මිථ්‍යා කතාවල මෙන් අපැහැදිලි කතන්දරයකි. The Youth Doctors නම් පොතේ කතුවරයා වන Patrick McGradyට අනුව, Monroe සතියකට ඩොලර් 75ක කොන්ත්‍රාත්තුවක් ලබාගත් තැනැත්තියක ලෙස හැඳින්වෙනවා.
එහිදී එක් සාදයකදී මැරලින් තමාව “නිකටක් නැති ආශ්චර්යයක්” ලෙස හඳුන්වා දුන් බවද කියනවා.
මැක්ගේ‍ර්ඩි පවසන පරිදි, ගුර්ඩින්ගේ කාර්යාලයේ බොහෝ විට සැත්කම් කළ ශල්‍ය වෛද්‍යවරයකු වන ජෝන් පැන්ග්මන්ගෙන් මොන්රෝ උපදෙස් ලබාගෙන ඇත. ඔහු ඇගේ නිකටෙහි මෘදු පැතලි බව හඳුනාගෙන කාටිලේජ් බද්ධ කිරීමක් සිදුකර ඇත. ඇයට සුවය ලැබීමට කාලය අවශ්‍ය වූ බැවින් මොන්රෝ ඇගේ නිකට තුවාල වුවා කියා තිරපිටපත් පරීක්ෂණයක් කල් දැමූ බවද කියැවෙනවා.
අවසානයේ ඇය එම පරීක්ෂණයට මුහුණ දුන් පසුව අධ්‍යක්ෂවරයා “පැටියෝ ඔයාට මීට අවුරුදු දෙකකට කලින් ඔයාගේ නිකට කපන්න තිබුණා” කියා කියූ බවද මැක්ගේ‍ර්ඩ් කියනවා.
ඇගේ නාසය මුල්කාලීන හා පසුකාලීන ඡායාරූපවල දෙවිදිහකට පෙනේ.
මෙය සංචාරයකට සහභාගිවීමේදී අහම්බෙන් වැටුණු නිසා කැඩීයෑමකින් ඇති වූ පලුද්දක් බව මොන්රෝ පවසනවා. නමුත් ගුඩ්මන් සොයා ගත් පරිදි මැරලින්ගේ මනෝ උපදේශකයා සිදුකළ අපහරණයක් නිසාවෙන් එය සිදුවුණු දෙයක් ලෙස සැක කරනවා.
1962දී, මොන්රෝගේ X-කිරණ සමාලෝචනය කළ විකිරණවේදීන්ට ඇගේ නාසයේ කිසිදු බිඳීමක් සොයා ගන්න බැරි වෙනවා. නමුත් ලීෆ් කුතුහලයෙන් සිටියේ අනාගතයේ එන වඩා නවීන මෙවලම් කිසියම් වෙනස් දෙයක් සොයා ගනී කියායි. මෑතකදී ඔහු නැවතත් චිත්‍රපට කිහිපයක් පර්යේෂණ සඳහා යවමින් මේ පිළිබඳව විමසනවා. මෙවර විකිරණවේදීන්ට නාසික අස්ථීයේ කෙළවරේ කුඩා අස්ථි බිඳීමක් සොයාගැනීමට හැකි වූ අතර එයින් සනාථ වූයේ ඇය ප්ලාස්ටික් සැත්කමකින් නාසය වෙනස් කළ බවයි.
මැරලින්ගේ මරණය මාෆියා සංවිධානයකින් සිදුකළේද?
එවකට එක්සත් ජනපදයේ නීතිපති රොබට් එෆ්. කෙනඩි නියෝග කළ සංවිධානාත්මක අපරාධ මැඬලීමේ කොටසක් ලෙස විමර්ශනය කරන ලද ඇමෙරිකානු වෘත්තීය සමිති නායක ජිමි හොෆා සහ චිකාගෝ මාෆියාවෙහි ප්‍රධානියා වූ සෑම් ගියන්කානා මෙම ඝාතනය මෙහෙයවා ඇති බව තමයි වාර්තා වෙන්නේ.
එම මාෆියා ඝාතකයන් 1962දී සුප්‍රසිද්ධ හොලිවුඩ් සුපිරි තරුව ඝාතනය කළේ ඇයට මාරාන්තික මත්ද්‍රව්‍ය සහිත එනැමාවක් ලබාදීමෙනි. ඇයගේ බඩේ පෙති කිසිවක් ඉතිරි නොකර ඔවුන්ගේ මාර්ග සැඟවීමට ඔවුන් තාක්ෂණය භාවිත කර ඇත. ජැක් කෙනඩි ජනාධිපති කිරීමේ ව්‍යාපාරයේ ජයග්‍රහණය සහතික කිරීම සඳහා සංවිධානය යොදා ගැනීමෙන් පසු කෙනඩි පවුලේ සාමාජිකයෙක් මාෆියාවට එරෙහිව ක්‍රියා කිරීමට තීරණය කිරීම හොෆ්ෆා සහ ජියන්කානා කෝපයට පත් කළේය.
එහෙත් ඇයගේ මරණය සියදිවි නසාගැනීමක් බවයි මරණ පරීක්ෂණයට අනුව ප්‍රකාශ කර තිබුණේ. බලධාරීන්ගේ වුවමනාව අනුව ඇයගේ මරණය සියදිවි නසාගැනීමක් යැයි කීම ප්‍රශ්නකාරී නොවේද?
අධිකරණ වෛද්‍ය සාක්ෂි සහ රජයේ ලියකියවිලි භාවිත කරමින් වසර තුනක් තිස්සේ මෙම නඩුව පර්යේෂණය කළ වෙන්ඩි ලී ලියූ “The Secret Letters|” නම් නවකතාවෙහි එය ඝාතනයක් බව තරයේම කියා සිටියි.
ඇගේ ඇඳ අසල ක්ලෝරල් හයිඩේට් බෝතලයක් තිබී ඇත. එහි තිබෙන පෙති 50න් 10ක් පමණ ඉතිරි වී තිබිණි. ලීගේ සැකය අනුව නම් ඇයට ඖෂධ ලබාදී ඇත්තේ එනැමාවක් ලෙසය. මත්ද්‍රව්‍ය මේ ආකාරයෙන් ලබාදුන්නේ කෙසේද යන්න තවමත් අබිරහසක් වුවද, ඇගේ සිරුරේ තැළීම්වලින් පෙනී යන්නේ මොන්රෝ ඇගේ මරණයට පෙර පොරබැදූ බවය.
මේ පිළිබඳව සවිස්තරාත්මක විශ්ලේෂණයක් ලබාගැනීම සඳහා විස විද්‍යාගාරයක් වෙත සාම්පල යවා ඇති වුවත් තවමත් පැහැදිලි විස්තරයක් ලැබී නොමැත. මැරලින්ගේ පටක සහ අනෙකුත් ශරීර සාම්පල අතුරුදන් වීම මූලික විමර්ශනයට බාධාවක් විය.
Los Angeles District Attorney’s medical-legal section and attended Monroe’s autopsy ප්‍රධානියා වූ සහ මොන්රෝගේ මරණ පරීක්ෂණයට සහභාගි වූ ජෝන් මයිනර් විශ්වාස කරන්නේද එය බොහෝවිට එනැමාවක් මඟින් සිදුකළ බවකි. ජෝන් මයිනර් මේ ගැන මෙහෙම කියනවා.“ ඔබට යමෙකු මරා දැමීමට අවශ්‍ය නම්, එය එනැමාවක් මඟින් සිදුකරන විට ආමාශයේ කිසිදු අපද්‍රව්‍යයක් ඉතිරි කරන්නේ නැහැ. මාරාන්තික මාත්‍රාවක් එලෙස ශරීර ගත කළ විට මරණය අබිරහසක් වෙනවා.”
කෙසේ වෙතත් මේ ප්‍රහේළිකාවට නිශ්චිතවම පිළිතුරු දිය හැකි මිනිසුන් දෙදෙනාම ඒ පරීක්ෂණ සමය වන විට මිය ගොස් තිබිණි. ජිමී හොෆ්ෆා 1975දී අතුරුදන් වූයේය. එය මාෆියාවකින් සිදුකළ ඝාතනයක්ද යන්න ප්‍රශ්නයකි. එම වසරේම ජියාන්කානා ද මිය ගියේය. ඔහු කෙනඩි සහෝදරයන් සමඟ ඔහුගේ සම්බන්ධතාවය ගැන සාක්ෂි දීමට පෙර දින රාත්‍රියේදී මියගියා.
ලීට අනුව, මොන්රෝගේ ඝාතනයට තුඩු දුන් මාවත ආරම්භ වූයේ මීට වසර 30කට පමණ පෙර කෙනඩි වංශයේ ප්‍රධානියා වූ ජෝ කෙනඩි, 1930 ගණන්වල කොල්ලකෑමේ කුප්‍රකට මෙහෙයුමකට මූලිකත්වය දුන් මාෆියා ප්‍රධානී ෆ්‍රෑන්ක් කොස්ටෙලෝගේ හවුල්කරුවෙකු වීමෙන් පසුවය.
දශක ගණනාවකට පසු ජැක් කෙනඩි ජනාධිපතිවරණයට තරග කිරීමට තීරණය කළ විට, ඔහුගේ පියා නැවතත් කෝසා නොස්ට්‍රාට ඡන්දය දිනා ගැනීමට උදවු ඉල්ලා සිටි බව කියයි. කෙසේ වෙතත්, බොබී කෙනඩි නීතිපති වී සංවිධානාත්මක අපරාධ මර්දනය කිරීමට තීරණය කිරීමත් සමඟ කෙනඩිවරුන්ගේ මාෆියාව සමඟ ඇති සම්බන්ධය ඉක්මනින් නරක අතට හැරිණි.
ජිමී හොෆ්ෆා Teamsters ට්‍රක් රථ සංගමයේ බලවතා සහ සංවිධානාත්මක අපරාධවලට සමීප සම්බන්ධතා ඇති කප්පම්කරුවෙක් විය. නීතිඥයකු වන කෙනඩි ඒ වන විටත් උසාවියේදී හොෆ්ෆා සමඟ සටන් කර ඇති අතර ඔවුන් සතුරන් විය. 1962දී, කෙනඩිගේ නියෝගය මත අධිකරණ දෙපාර්තමේන්තුව විසින් විමර්ශනය කරන ලදී. ජියන්කානා සහ හොෆ්ෆා ඔවුන්ගේ ගැටලු විසඳීමට එක් විය. මොන්රෝ සමඟ ඇති සම්බන්ධය හරහා ජෝන් එෆ්. කෙනඩි අපකීර්තියට පත් කිරීමට හොෆ්ෆා සහ ජියන්කානා තීරණය කරනවා.
ඇගේ දුරකථනය සහ නිදන කාමරයේ දෝෂයක් ඇති කරමින් එය නිරාකරණය කිරීමට එන සේවකයකුගේ සහාය ලබා ගනිමින් ඔවුන් එය සිදු කරනවා. කෙනඩි කිසි විටෙකත් මේ සම්බන්ධතාවය පිළිනොගන්නා බව ඔවුන් දැන ගෙන සිටියා. ඒ හේතුව නිසා මොන්රෝ ඝාතනය කිරීමට ඔවුන් තීරණය කළ බව පැවැසෙනවා. මේ මාෆියා සංවිධානයේ අකටයුත්ත නිසා අවසානයේ මරණයට පත්වන්න සිදුවූයේ මැරලින්ටය. මැරලින් අපරාධකරුවන් සහ මාෆියා සමඟ සම්බන්ධ වූවායි කියන අමූලික බොරුව ගොඩනැඟුණේද මේ හරහාය.
1962 වසරේ පැවැත්වූ ඇමෙරිකානු ජනාධිපති කෙනඩිගේ උපන්දින උත්සවයේදී උපන්දින සුබ පැතුම් ගායනය සිදු කරන්නේ මැරලින්. මෙහිදී ඇයව නිවේදකයා හඳුන්වා දෙන්නේ ලේට් මැරලින් කියලා. ඒකෙ අදහස දිවංගත කියන එක. ඊට මාස තුනකට පස්සේ තමයි ඈ මිය යන්නේ.
ඒකෙදී සියුම්ව ඉඟි කරනවා ඇයට උරුම රහසිගත මරණයක් කියන එක. එදා මැරලින් ඇඳගෙන හිටපු ඇඳුම 2016දී ඩොලර් මිලියන 4.8කට වෙන්දේසි වෙනවා. 1962 අගෝස්තු 6 දා ඇය මේ ලෝකය හැරදා යනවා. ඒ වයස 36ක් දිවි ගෙවමින්. ඉතින් අදත් ඇය ගැන කතා කරනවා... චිත්‍රපට හැදෙනවා... මැරලින් යනු සදාකාලික සරාගීත්වයේ සංකේතය නොවේද? මැරලින් මෙලොවේ සදාකාලිකවම නොමැකෙන මතක සටහනකි.
මැරලින්ගේ ගෘහ සේවිකාවක් වූ යුනිස් මරේ ඇගේ අබිරහස් මරණයේ ප්‍රධාන සාක්ෂිකාරියකි. ඇය පාපෝච්චාරණය කළ බොහෝ කරුණු එකකට එකක් සම්බන්ධ නොවිණි. මේ නිසා මැරලින්ගේ මරණයට ඇයගේ යම් උදව්වක් තිබුණු බව කිව හැකිය.
මැරලින් මියගිය රාත්‍රියේ යුනිස් සිටියේ මැරලින් සමඟයි. ගෘහ සේවිකාව මුලින්ම කීවේ ඇය මධ්‍යම රාත්‍රියේ මැරලින්ගේ නිදන කාමරයේ දොරට තට්ටු කළ බවත් පිළිතුරක් නොලැබීම නිසා මැරලින්ගේ අප්‍රාණික සිරුර දැක ජනේලයෙන් ඇතුළු වී වෛද්‍යවරයාට කතා කළ බවත්ය.
මරේ පසුව ඒ විස්තරය තවත් වෙනස් කරමින් මෙහෙම කියනවා. ඇය මධ්‍යම රාත්‍රියේ නින්දට ගොස් අලුයම තුනට විතර මැරලින්ගේ නිදන කාමරයේ ආලෝකය දැල්වී ඇති බව දුටු නිසා වෛද්‍ය ග්‍රීන්සන් ඇමැතූ බව ඒ විස්තරයයි.
මරේ ඇගේ කතාව මේ විධියට බොහෝ වාරයක් වෙනස් කරමින් තමයි කියන්නේ. පොලිස් වාර්තාවලට අනුව, මරේගේ නොපැහැදිලි සාක්ෂි නිසා ඇය ඒ මරණයට උදවු දුන් බවට සැකයක් උපදිනවා. ඇයව කවුරුන් හෝ රූකඩයක් බවට පත් කළාද?
මැරලින්ගේ මරණය පිළිබඳ 1985 බීබීසී විමර්ශනයට මරේ සහභාගි වෙනවා. ඇය 1962දී උත්තර දුන් අයුරින්ම කතන්දරය බීබීසී විමර්ශනයට ඉදිරිපත් කළා. නමුත් අවසානයේ ඇගේ මයික්‍රෆෝනය තවමත් ක්‍රියාත්මක වෙන බව නොදැන සිටි ඇය කැමරාව දෙස බලමින් යමක් මුමුනනවා. “ඇයි මේ, මං මේ වයසෙ ඉද්දිත් මේ මරණය හොයා ගන්න උදවු කරන්න ඕනෙ?”
වෛද්‍යවරයා පැමිණෙන විටත් මැරලින් මිය ගොස් නොසිටි බව කියන මරේ කිසි විටෙකත්වැඩිදුර තොරතුරු හෙළි නොකර 1994දී මිය යනවා. සාජන් ජැක් ක්ලෙමන්ස් ඇතුළුව බොහෝ කතුවරුන්, මොන්රෝගේ මරණය වසන් කිරීමට මරේ සම්බන්ධ බවට ප්‍රසිද්ධියේ චෝදනා කරනවා.
වෛද්‍ය රැල්ෆ් ග්‍රීන්සන් 1961දී නෝර්ත් ඩොහෙනි ඩ්‍රයිව්හි බෙවර්ලි හිල්ස් නිවාස සංකීර්ණයක පදිංචිව සිටි මැර්ලින් මොන්රෝට ගෘහ සේවිකාවක විධියට මරේව බඳවා ගන්න බලකරනවා. ඒ වඩා විශ්වාසදායි සේවිකාවක් බව කියමින්. මැරලින් ඇගේ ජීවිතයේ අවසාන මාස ගත කරන බ්‍රෙන්ට්වුඩ් හි පස්වැනි හෙලේනා පාර අසල සැන්ටා මොනිකා හි පිහිටි මහල් නිවාසයක් තියෙද්දිත් බෙවර්ලි හිල්ස්වලට යන එක තවත් ප්‍රශ්නයක්. අනෙක මරේ සෑම රාත්‍රියකම මැරලින් ගාවම නිදාගන්න කෙනෙක්. මේක තවත් ප්‍රශ්නයක්. ඇයි එදා මරේ වෙන තැනක නිදාගත්තේ.
මැරලින්ගෙ බොහෝ මිතුරන් කියන විධියට මරේ මැරලින්ගෙ එදිනෙදා ජීවිතයෙ කටයුතු පවා ග්‍රීන්සන් වෛද්‍යවරයට වාර්තා කරල තියෙනවා. 1962 පෙබරවාරියේදී මැරලින් මෙක්සිකෝවට ගමනක් යනවා. මේක මාධ්‍යයෙත් ඉතා ප්‍රසිද්ධ වුණා. මැරලින් මේ ගමන යන්නෙත් මරේ එක්ක. මරේ මෙක්සිකානු දේශසීමා පැත්තේ හිටපු සමහර ප්‍රසිද්ධ කොමියුනිස්ට් නායකයන්ට මැරලින්ව මුණගස්වනවා. මැරලින් මේ සම්බන්ධතා ඇතිකර ගැනීම නිසා ජාතික ආරක්ෂාවට තර්ජනයක් ඇති වෙනවා. මරේගේ මේ මවාපෑම් නිසා මැරලින්ව FBI එකෙන් සැක කරන්න ගන්නවා.
අවසානයේදී මරේ මෙහෙමත් කියනවා. 1962 අගෝස්තු 4 වැනිදා සවස මැරලින් ඇගේ හිටපු සැමියාගෙ පුතා සමඟ දුරකථනයෙන් කතා කරල තියෙනවා. ඒ තමයි යුනිස් කියන විධියට මැරලින් ජීවතුන් අතර සිටිනවා දුටු අන්තිම දර්ශනය. යුනිස් කියන විධියට එයා මධ්‍යම රාත්‍රියෙ අවදිවෙලා බැලුවම මැරලින්ගෙ අතේ දුරකථන රැහැනක් තිබෙනවා. මැරලින් කියන්නේ ඉතා සැහැල්ලුවෙන් නිදාගන්න කෙනෙක්. සාමාන්‍යයෙන් මැරලින් ඇගේ දුරකථනය තියා ගන්නේ නිදන කාමරයෙන් පිටත.
මේකත් බරපතළ ප්‍රශ්නයක් වුණා. කොහොමත් යුනිස් අවසන් රාත්‍රියේදි මැරලින් කළේ කුමක්ද කියන ප්‍රශ්නය නිතරම මඟහරිනවා. මැරලින් ඒ වන විටත් ජනාධිපති ජෝන් එෆ්. කෙනඩි සහ ඔහුගේ සොහොයුරා වන රොබට් කෙනඩි සමඟ සබඳතා පැවැත් වූ බවට වාර්තා වෙනවා. මේ නිසා 1962 අගෝස්තු 4 වැනිදා රොබට් මැරලින්ගේ නිවෙසේ සිටි බවත් ඔවුන් රණ්ඩු වූ බවටත් කටකතා පැතිරෙන්න ගන්නවා. 1983 සම්මුඛ සාකච්ඡාවකදී මාධ්‍යවේදියෙක් යුනිස්ගෙන් අහන ප්‍රශ්නයකට ඉයුනිස් දෙන්නේ ප්‍රශ්නකාරී උත්තරයක්
“අනේ ඇයි මම මේක දිගටම වසන් කරන්නේ?” මාධ්‍යවේදියාට කටඋත්තර නැති වෙනවා. පසු කාලීනව දැනගන්න ලැබෙන්නේ රොබට් කෙනඩි අගෝස්තු 04 වැනිදා මැරලින් සමඟ ගත කරපු බවයි.
මැරලින් කෙනඩි දෙසොහොයුරන්ගේ ප්‍රේමවන්තියද?
මැරලින් මියගිය පසු වැදගත් අධිකරණ සාක්ෂි, වෛද්‍ය සාක්ෂි බොහොමයක් අතුරුදන් වෙනවා. මොන්රෝගේ ව්‍යාපාර කළමනාකරු ඉනෙස් මෙල්සන්, ඇය මියගිය පසු ඇගේ ලිපි ලේඛන පුලුස්සා දානවා. ඒ වගේම මෙල්සන් ඇගේ කැබිනට්ටුවෙ දොරගුලු මාරු කිරීමත් යම් තරමක ප්‍රශ්නයක් මතු කරනවා.
ඇගේ මරණයට මාස ගණනකට පෙර කෙනඩිවරුන් නිතර නිතර මැරලින්ව මුණගැහෙනවා. මේ හේතුවෙන් ඈ ගැබ්ගත් බවත් එම ගැබ ගබ්සා කළ බවත් ඇගේ මිතුරියකට මැරලින් කියා තිබෙනවා. ඇගේ මරණයට දින කිහිපයකට පෙර මැරලින් ඈන් කාර්ගර් නම් මිතුරියකට කියා සිටියේ ඇය රොබට්ට ආදරය කරන බවත් ඔහු සමඟ විවාහ වීමට සැලසුම් කරන බවත්ය. රොබට් ඒ වන විටත් විවාහකයෙකි. ප්‍රශ්නය හට ගන්නේ මේ නිසාම නොවේ.
මැරලින් තමන්ගේ මනෝ වෛද්‍යවරයා වන රැල්ෆ් ග්‍රීන්සන්ට විශාල හෙළිදරව්වක් කර ඇත. ඇය ආණ්ඩුවේ ඉතා වැදගත් පුද්ගලයන් සමඟ ඉහළම මට්ටමේ ලිංගික සම්බන්ධතා පවත්වාගෙන ගොසින් ඇත. මැර්ලින්ගේ ගෘහ සේවිකාව යූනිස් මරේ පසුව ප්‍රකාශ කළේ ඇය මියගිය දිනයේ රොබට් මැරලින්ගේ නිවෙසේ සිටි බවයි. මැරලින් රාත්‍රි 9.30ට හොලිවුඩයේ කොණ්ඩ මෝස්තර ශිල්පිනියක් වන සිඩ්නි ගුයිලරොෆ්ට ඇමැතුමක් අරන් තිබෙනවා.
අගෝස්තු 4 වැනිදා ඇය ගුයිලරොෆ්ට කියා තිබුණේ, රොබට් කෙනඩි ඇය සමඟ විවාහ වීමට සිටින බවත්, ඔහු ඇයට තර්ජනය කරන බවත්ය. එමෙන්ම ඔහු හා මැරලින්ට සම්බන්ධයක් තිබෙන බවත්, ජෝන් එෆ්. කෙනඩි සමඟත් එලෙසම සම්බන්ධයක් තිබෙන බවත් රොබට් එම සම්බන්ධය අදින් අවසන් කළ යුතු බවත්, ඔහු සමඟ කතා කිරීමට ධවල මන්දිරයට යළි නොඑන බවටත් තර්ජනය කළ බව සිඩ්නි ගුයිලරොෆ්ට මැරලින් කියා තිබෙනවා. කෙසේ හෝ මේ තරමින් තර්ජනය කිරීම මඟින් හෙළිවන්නේ ඇය කෙනඩි පවුලේ අබිරහස් රැකගෙන සිටි බවය.
Post a Comment