2024 වසරේ මෙම කාලයට සාපේක්ෂව වසරේ මුල් මාස හතර තුළ මෙරට අපනයනය සියයට 6.9කින් වර්ධනය වී ඇති අතර, එහි ආදායම ඩොලර් මිලියන 5,583.25ක් වූ බව ශ්‍රී ලංකා අපනයන සංවර්ධන මණ්ඩලය (EDB) විසින් නිකුත් කරන ලද දත්ත පෙන්වා දෙනවා.
අප්‍රේල් මාසයේදී මුළු වෙළෙඳ භාණ්ඩ හා සේවා අපනයනය ඩොලර් මිලියන 1,292.63ක් වූ අතර, එය වසරින් වසර සියයට 8.74ක වර්ධනයක් සනිටුහන් කර තිබෙනවා.
එමෙන්ම ජනවාරි සිට අප්‍රේල් දක්වා කාලය තුළ, වෙළෙඳ භාණ්ඩ අපනයන 2024 වසරේ එම කාලයට සාපේක්ෂව සියයට 6.86කින් වර්ධනය වී තිබුණා.
2025 අප්‍රේල් මාසයේදී සේවා අපනයනයෙන් ඇස්තමේන්තුගත ආදායම ඩොලර් මිලියන 309.3 දක්වා ළඟා වී තිබෙනවා.
තවද, වසරේ මුල් මාස හතර තුළ, සේවා අපනයන සියයට 7.06කින් වැඩි වී ඇති බවට ඇස්තමේන්තු කර ඇති අතර, එය මුළු ඩොලර් මිලියන 1,189.63ක් බවටයි වාර්තා සඳහන් කරන්නේ.
ඇඟලුම් සහ රෙදිපිළි අපනයන ආදායම 2024 අප්‍රේල් මාසයට සාපේක්ෂව අප්‍රේල් මාසයේදී වසරින් වසර සියයට 13.52කින් ඉහළ ගොස් ඩොලර් මිලියන 364.47ක් වී තිබුණා.
තේ අපනයන ආදායම වෙළෙඳ භාණ්ඩ අපනයනයෙන් සියයට 12ක් වූ අතර, 2024 අප්‍රේල් මාසයට සාපේක්ෂව අප්‍රේල් මාසයේදී එය ඩොලර් මිලියන 107.34ක් දක්වා වසරින් වසර සියයට 12.45කින් ඉහළ ගොස් තිබෙනවා.
තේ පැකට් අපනයනයේ ශක්තිමත් ක්‍රියාකාරිත්වය හේතුවෙන් මෙම වැඩිවීම ප්‍රධාන වශයෙන් සිදුවී ඇති අතර එය අපනයනයෙන් සියයට 27.6ක්.
ඊට අමතරව, 2024 එම මාසයට සාපේක්ෂව අප්‍රේල් මාසයේදී තේ අපනයන පරිමාව සියයට 11.17කින් වැඩිව තිබෙනවා.
ඉරාකය, ලිබියාව සහ ඉරානය වෙත තේ අපනයනය පිළිවෙලින් සියයට 46.7, සියයට 292.3 සහ සියයට 115.96ක සැලකිය යුතු වැඩිවීමක් වාර්තා කිරීම කැපී පෙනෙනවා.
2024 වසරේ එම මාසයට සාපේක්ෂව අප්‍රේල් මාසයේදී පොල් ආශ්‍රිත නිෂ්පාදනවලින් අපනයන ආදායම සියයට 21.54ක සැලකිය යුතු වැඩිවීමක් පෙන්නුම් කරන බව වාර්තාවල දැක්වෙනවා.
Post a Comment